Flash síður og Dolphin vörur

Var að skoða flash heimasíðu J.K. Rowling höfund Harry Potter bókanna, http://www.jkrowling.com Heimasíðan er öll smíðuð með Flash viðmóti þar sem aðgengi hefur verið haft að leiðarljósi. Ég lenti strax í vandræðum með HAL vegna þess að í hvert skipti sem síðan uppfærðist, mynd hreyfðist til á skjánum, þá byrjaði HAL aftur að tala. Þar sem ég gat ekki í fljótu bragði fundið á heimasíðu Dolphin hvernig ætti að ferðast um Flash heimasíður þá ákvað ég að taka saman nokkrar upplýsingar.

Þegar við rekumst á Flash hnapp á heimasíðu sem HAL greinir, en það er nú því miður ekki alltaf þannig að HAL greini þetta á þennan hátt, þá segir skjálesarinn: "Embedded Flash Object". Til að virkja, sem sagt smella, á þennan hnapp og þannig kalla fram upplýsingarnar þá styðjum við á: "Bilslánna". Ef við tökum sem dæmi You Tube myndbönd sem eru fléttuð inn í heimasíður, þá getum við spilað myndbandið með því að styðja á bilslánna.

En þegar við komum að heimasíðum sem eru byggðar upp í Flash, þó ekki sé nema einhver hluti síðunnar smíðaður á þennan hátt, þá þurfum við að geta ferðast milli möguleika/lína í flash viðmótinu. Það gerum við með því að styðja á Dolphin lykilinn og F. Sjálfgefin stilling í HAL og Supernova er að Dolphin lykillinn sé: "CAPSLOCK". Þannig að við myndum sem sagt styðja á CAPSLOCK og F, til að geta síðan notað örvalyklana til að ferðast milli möguleika/lína inni í Flash viðmótinu.

Síðast en ekki síst er það Anti-stutter eiginleikinn í HAL og Supernova. Anti-stutter anti-stam eiginleikinn, (en skelfileg þýðing hjá mér <bros>) gerir það að verkum að HAL og Supernova hætta að fylgjast með uppfærslum/breytingum á viðmótinu á heimasíðunni. Það hafa vafalítið einhverjir lent í því að vera á heimasíðu eins og mbl.is og skjálesarinn byrjar í sífellu að lesa upp sömu auglýsinguna aftur og aftur og ekki virðist vera mögulegt að halda áfram að lesa venjulegan fréttatexta. Þetta er líklega vegna þess að það er Flash auglýsing á síðunni, kannski frá einhverjum bankanum, sem er í lúppu. Byrjar alltaf að spila aftur og aftur sama myndbandið. Skjálesarinn reynir að láta okkur vita af þessum upplýsingum, en það verður á kostnað textans sem við erum nú þegar að lesa. Í slíkum tilvikum getur verið hagkvæmt að hafa á bak við eyrað að við getum slökkt á þessum eilífu tilkynningum um að nýjar upplýsingar hafi birst á skjánum með því að virkja/afvirkja þennan anti-stutter eiginleika. Þetta er hagkvæmast að gera með flýtilykli: "Vinstri Control og 6". Skjálesarinn segir þá: "Kveikt/slökkt á anti-stutter".

Það er rétt að taka það fram að heimasíðan sem ég nefndi hér í upphafi, hennar J.K. Rowling, býður líka upp á svokölluð Accessibility Tools, en það er tengill á síðunni. Þar inni er hægt að slökkva á ýmsum eiginleikum síðunnar. Svo sem auka hljóðum og hreyfingu yfir síðuna sem gætu virkað truflað á suma notendur.